Дзюдо бўйича Ўзбекистон терма жамоаси аъзолари Диёрбек Ўрозбоев ва Дилшод Чориев Туркиянинг Самсун шаҳрида ўтказилган Гран-при туркумига кирувчи халқаро турнирда бронза медални қўлга киритди. “ЎзА” хабар бермоқда.

Нуфузли турнирда олтмишдан зиёд давлатдан тўрт юзга яқин спортчи совринли ўринлар билан бирга жорий йил Бразилиянинг Рио-де-Жанейро шаҳрида бўлиб ўтадиган XXXI ёзги Олимпия ўйинларига йўлланма берувчи рейтинг очколари учун ҳам беллашди.

Вазни 60 килограммгача бўлган дзюдочилар беллашувида қатнашган Диёрбек Ўрозбоев мўғулистонлик Амартувшин Баяраа, грузиялик Лухуми Чхвимянини енгиб, мезбон спортчи Бакир Озлуга имкониятни бой берди. Бронза медаль учун кечган беллашувда беларуслик Ориф Багиров ва франциялик Винсент Лимарни мағлуб этди.

90 килограмм вазн тоифасида Дилшод Чориев беларуслик Ихар Жукау, швейцариялик Сирил Гроссклаус, испаниялик Николоз Шеразадишвилини мағлуб этиб, россиялик Ҳусен Холмирзаевга имкониятни бой берди. Учинчи ўрин учун кечган беллашувда польшалик Патрик Чехомски устидан ғалаба қозонди.