Air France авиакомпанияси рўмол ўрашни истамаган стюардессаларга Эронга рейслардан воз кечишга рухсат берди, деб хабар бермоқда авиакомпания матбуот хизматига иқтибос келтирган ҳолда РИА “Новости” ахборот агентлиги.

Таъкидланишича, авиакомпания Теҳронга рейсларни қайта бошлашдан аввал стюардессалар "парвоз вақтида шимлар ва эркин турувчи курткада бўлишлари, самолётдан ташқарида эса сочларини ва бошларини рўмол билан ўрашга" чақирилган хизмат мактубини чоп этди.

Авиакомпаниянинг бу талаблари стюардессаларнинг норозилигини келтириб чиқарди.

"Теҳронга борувчи рейсга стюардесса ёки учувчи белгиланганда, Air France уларга рейсдан воз кечиш ёки уни алмаштириш имконини беради. Барча ходималар рўмол ўрашдан воз кечишлари ҳақида барвақтроқ хабар беришлари керак бўлади", дейилди компанияда.

Аввалроқ Европанинг бир қатор авиакомпаниялари 5 йиллик танаффусдан кейин Эронга парвозларни қайта йўлга қўйишни режалаштираётганлари маълум қилинганди.