Арманистонлик хакерлар Озарбайжон Мудофаа вазирлиги сайтини бузиб киришди ва 25 минг озарбайжонлик ҳарбий ҳақидаги маълумотларни тармоққа тарқатиб юборди. Бу ҳақда медиатаҳлилчи Самвел Мартиросян ўзининг фейсбуки орқали маълум қилган.

Бу ҳужум Monte Melkonian Cyber Army гуруҳи томонидан амалга оширилган.

Бир неча кун олдин бу гуруҳ Озарбайжон ҳукумати сайтига қилинган ҳужум учун жавобгарликни зиммасига олганди. Айни вақтда gov.az фаолияти тикланган.

2 апрелга ўтар кечаси Тоғли Қорабоғда Озарбойжон-Арманистон низоси яна янгиланди. Икки томон ўртасида ўт очиш бошланиб кетди ва ҳалигача давом этмоқда. Низонинг қайта бошланиши учун икки томон бир-бирини айбламоқда.

Қорабоғ можароси, аҳолисининг асосий қисми арманлардан ташкил топган Тоғли Қорабоғ 1988 йилда Озарбайжон таркибидан чиқишини эълон қилгач бошланган. Тоғли Қорабоғ аҳолисининг 99,89 фоизи Бокудан тўлиқ мустақил бўлишни ёқлаб чиққан референдумдан кейин, кенг кўламли ҳарбий ҳаракатлар бошланган. 1994 йил май ойида сулҳ тузиш ҳақидаги келишувлар кучга кирди. Ҳудудлар чегарасида доимий равишда беқарор вазият сақланиб келади.