2015 йилда қуролланишга кетган харажатлар миқдори дунё бўйлаб бир фоизга ошди ва 1,7 триллион долларга етди. Бу ҳақида дунё муаммолари билан шуғулланувчи Стокгольм тадқиқот институти маълум қилади. Россия бу рейтингда 4-ўринни эгаллаган - 66,4 миллиард доллар ҳарбий мақсадларга сафарбар қилинган. Бу кўрсаткич 2014 йилдагидан 7,5 фоизга кўп.

Ҳарбий харажатлар рейтингида АҚШ етакчилик қилмоқда. Чиқимлар 2,4 фоизга камайганига қарамай, умумий қиймат 596 миллиард долларни ташкил этди. 2-ўрин Хитойга тегишли - 215 миллиард доллар, харажатлар 7,4 фоизга кўпайган.

Учликни Саудия Арабистони мамлакати якунлайди - 87,2 миллиард доллар, чиқимлар 5,7 фоизга ортган.

"2015 йилнинг ҳарбий мақсаддаги харажатлари контраст тенденцияни намойиш этади: бир томондан улар дунёнинг турли бурчакларида ортиб бораётган зиддиятларни акс эттирса, бошқа томондан охирги ўн йилликдаги нефть билан боғлиқ ҳарбий чиқимларнинг камайишини кўрсатади", деди лойиҳа раҳбари Сэм Перло-Фриман.

Унинг сўзларига кўра, бундай ўзгарувчан сиёсий ва иқтисодий вазият кейинги йилларда тушуниб бўлмас тус олади.

SIPRIнинг йиллик маълумоти АҚШ ва Россия 2011-2015 йилларда қурол экспорти билан шуғулланувчи энг йирик давлатлар эканлигини кўрсатади. Қурол савдосининг 58 фоизи шу икки давлатга тўғри келади. Ҳарбий экспортнинг 33 фоизи АҚШга, 25 фоизи Россияга тегишли.