Исландия аҳолиси мамлакат пойтахти Рейкьявик шаҳридаги марказий майдонда тўпланишди. Улар мамлакат бош вазири Сигмюндюр Гюннлейгссоннинг офшор компанияси ҳақидаги маълумотлар пайдо бўлгани туфайли унинг истеъфосини талаб қилишмоқда.

Bloomberg нашрининг маҳаллий полицияга асосланиб хабар беришича, намойишда камида 4 минг киши иштирок этган. Шаҳар аҳолиси сони эса 120 мингга яқинни ташкил этади.

"Мен шунинг учун бу ердаманки, ҳукуматдан норозилигимни билдириш учун. Қачонки, қонунларни чиқарувчиларнинг ўзлари қонунларга амал қилмас экан бу ҳолатни бартараф этиш керак", дейди иштирокчилардан бири.

Яна бир намойишчи эса бош вазир ўз маҳкамаси билан биргаликда истеъфога чиқишини кутаётганини билдирган.

3 апрель куни Mossack Fonseca компанияси маълумотлар базасидан ахборот чиқиб кетиши натижасида ОАВда қатор дунё етакчилари ва уларнинг яқинлари пул ювиш ва солиқлардан бош тортиш бўйича схемаларга алоқадорлиги ҳақида маълумот пайдо бўлган эди.

"Панама ҳужжатлари" ошкор этилиши воқеасидан сўнг Гюннлейгссон ва унинг рафиқаси 2007 йилда Британия Виржиниясида Wintris Inc номли офшор компания тузгани маълум бўлди.