Корея Халқ Демократик Республикасининг бош ядро объекти – Йонбенда фазовий разведка воситаси ёрдамида “шубҳали фаоллик” кузатилган. Бу ҳақда Reuters хабар берди.

Сўнгги беш ҳафта давомида радиокимёвий корхонанинг плутоний ишлаб чиқариш учун асосий мосламаси бўлган иссиқлик блогида газ чиқиндилари қайд этилган.

Бу эса радиоактив материалларни қайта ишлаш жараёни қизғин давом этаётганидан дарак, деб ҳисоблашади америкалик экспертлар.

6 январь куни КХДР водород бомбаси синови муваффақиятли ўтганини расман маълум қилган. Айни шу кунда АҚШ геологик хизмати Шимолий Корея ҳудудида 5,1 балл магнитудали зилзилани қайд этди. Сеул эса зилзиланинг эпимаркази Пхеньян ядро портлаш ускуналарининг охирги синовларини ўтказган полигоннинг жойлашуви билан монанд эканини аниқлади.

Натижада БМТ Хавфсизлик Кенгаши КХДРга қарши ўта кескин чекловларни назарда тутувчи янги санкциялар пакетини тасдиқлади.