Тилшунос Микаэл Парквалль Швецияда тарқалганлик бўйича иккинчи тил араб тили бўлаётганини таъкидламоқда. Бу ҳақда ТАСС ахборот агентлиги хабар бермоқда.

"Ўтган йили катта миқдорда қочқинлар келгани эътиборга олинса, ҳозир араб тили, швед тилидан кейин, мамлакатда тарқалганлик бўйича фин тилидан ўтмоқда", деб айтди тилшунос.

Парквалль сўровномалар ҳамда миграция бошқармаси ва мактаб таълими бошқармаси маълумотларига асосланиб бундай хулосага келмоқда. 2012 йил маълумотларига кўра, Швециянинг 200 минг аҳолиси фин тилини ўзининг она тили деб айтган, араб тили эса 155 минг киши учун она тили бўлган.

Охирги йилларда мамлакатга Яқин Шарқдан келган муҳожирлар сони бир неча ўн минглаб кишини ташкил қилди. Ўтган йили аҳолиси 9,8 млн киши бўлган Швеция 163 минг қочқинни қабул қилди.

Бироқ Швеция мамлакат аҳолиси сўзлашадиган тиллар бўйича расмий статистика олиб бормайди, чунки бундай статистик маълумотлар мамлакатда яшовчи этник озчиликни камситади, деб ҳисоблайди.