Украинада инқироз туфайли 1,5 миллион одам очлик балосига дуч келди. Улардан 300 нафари озиқ-овқатга ўта эҳтиёжманд ва тезкор ёрдамга муҳтож.

Ушбу маълумотлар БМТ сайтида эълон қилинган Жаҳон озиқ-овқат дастури баёнотида маълум қилинди.

Жаҳон озиқ-овқат дастури 2016 йилнинг биринчи ярмида ҳудуд аҳолисининг деярли 270 минг нафарига ёрдам кўрсатишни режалаштирган. 2014 йил ноябрь ойидан бошлаб БМТ агентлиги ярим миллиондан ортиқ одамни озиқ-овқат маҳсулотлари билан таъминлаган.

2016 йил биринчи квартал якунига кўра, Украина ташкилотдан озиқ-овқат маҳсулотлари сўраган ва қабул қилган ягона Европа мамлакати бўлди.

Украина ҳудудининг ярмидан ошиғи деҳқончилик қилиш мумкин бўлган ерлардир. Ушбу табиий афзаликка қарамай, совет давридан сўнг Украинанинг қишлоқ хўжалик сектори кескин сусайиб кетди. Янги мингйилликнинг бошланишида ИЯМ кўрсаткичининг ўсиши бу сусайишни қисман қоплаб турди, лекин 2000-йиллар охирида жаҳон иқтисодий инқирози таъсирида кескин пасайиш бошланди.

Баёнотда келтирилишича, Украина аҳолиси қисқариб бормоқда — 1991 йили мустақилликка эришганидан буён 6 миллион нафардан ортиқ одамга камайган.