Украина Беларусь чегарасидан ўтиш тартибини келишиб олди, деб хабар берилмоқда Украина ташқи ишлар вазирлиги сайтида.

"Украина фуқароларининг Беларусга ўтиши фақатгина хорижий паспортлар билан амалга оширилади", дейилмоқда хабарда. Таъкидланишича, Беларусь фуқаролари Украинага Беларусь фуқаролиги паспорти билан кирадилар, бу ҳужжат чегарадан ташқарига чиқиш учун паспорт ҳам ҳисобланади.

Томонлар бу ўзгартириш кучга кирадиган муддатларни белгилаб олдилар. 2017 йил 1 январдан халқаро аэропортларда украиналикларнинг Беларусга фақатгина хорижий паспорт билан кириши тартиби киритилиши режалаштирилмоқда. Темир йўл ва автомобиль транспорти халқаро ва давлатлараро пунктларида эса буни 2017 йил 1 апрелдан, маҳаллий пунктларда эса 2018 йил 1 январдан киритиш мўлжалланган..

Аввалроқ Беларусь ўз чегарасидан карточка кўринишидаги янги ID-паспортларга эга украиналикларни ўтказмаётгани маълум қилинганди. Бундай паспортлар украиналикларга 2016 йил 1 январдан бошлаб берила бошланган.