Ўзбекистонда 2016-2020 йиллар мобайнида табиий газни автоматик ҳисоблаш тизими тўлиқ ишга туширилади. Бу ҳақда "Ўзтрансгаз" АЖнинг лойиҳа бўйича раҳбари Шаҳноза Исломова Sputnik мухбирига маълум қилган.

Шу мақсадда, келаси 4 йил мобайнида, умумий қиймати 800 миллион долларлик 3,5 миллионта газҳисоблагичлар ўрнатилади.

Мазкур тизим таркибига газҳисоблагич ускунаси, маълумотларни тўплаш, қайта ишлаш ва жўнатиш тизими, алоқа кабеллари ҳамда зарурий телекоммуникация қурилмалари киради. 800 миллион доллар қийматидаги лойиҳанинг 200 миллион доллари хорижий кредитлар ва қолган қисми маҳаллий заҳиралар ҳисобига молиялаштирилади.

2015 йил май ойида "Ўзбекнефтгаз" компанияси Тошкент ва Тошкент вилоятида табиий газни автоматик ҳисоблаш тизимини барпо этиш бўйича танлов эълон қилганди. Унга кўра, паст босимли газ тармоқларида масофадан ҳисоблашни йўлга қўйиш учун 1,04 миллион дона ҳисоблагични ўрнатиш режаалаштирилган. Лойиҳа 2 йил мобайнида амалга оширилади. Унинг қиймати 217, 3 миллион АҚШ долларини ташкил этади. Тендер якунлари 2016 йил баҳор мавсумида эълон қилинади.

Компания маълумотларига кўра, бугунги кунда, мамлакатдаги табиий газ истеъмолчиларининг 60 фоизга яқинига ҳисоблагичлар ўрнатилган бўлса-да, маълумотларни жамлаш ва бошқариш бўйича замонавий тизимнинг мавжуд эмаслиги, газ истеъмолини назорат қилишда камчиликларга йўл қўйилишига олиб келмоқда.

Охирги йилларда мамлакатда газ истеъмоли 1,3 мартага ортиб, йилига қазиб олинадиган 60 млрд куб метрга яқин газдан тахминан 45 млрд куб метри маҳаллий мижозларга етказиб берилади. Расмий маълумотларга кўра, 2013 йилда магистрал газ қувурларида йўқотилган газ миқдори 2,1 фоизни ташкил этган. Газ тақсимлаш тармоқларида бу рақам 2,4 фоиздан иборат бўлган. Нодавлат экспертларнинг фикрича, табиий газдан фойдаланиш чоғида 25 фоизи йўқотилади.