Нидерландиянинг Philips компанияси, Марс ва Ойда истеъмол қилса бўладиган ўсимликлар етиштиришда фазогирларга ёрдам бериш ниятида.

Компания Аризона университети билан ҳамкорликда ерга ишлов беришда энергиядан самарали фойдаланиш, хусусан, ўсимликларни етиштиришда ёруғлик мосламаларини қўллаш усулларини яратиш устида иш олиб бормоқда.

Сунъий Ой шароитида салат баргини етиштириш учун 9 ҳафталик тадқиқот натижалари шуни кўрсатдики, сув ёрдамида совутилувчи натрий газразрядли лампалар ўрнига LED-тизимли ёруғлик лампалардан фойдаланиш ҳосилни кўпайтириб, энергия сарфини 56 фоизга камайтириш имконини берган. Бунда диодли лампалардан нафақат фазода, балки сайёрамизнинг сув ёки энергия танқислиги, шунингдек, тупроқ унумдорлиги яхши бўлмаган жойларида фойдаланиш яхши натижаларни беради.

Philips GreenPower дастури эса, ёруғликни ўсимликларга бир хил таратиш имконини яратади. Бу ўз навбатида олинажак ҳосил миқдорини аниқроқ тахмин қилишда ёрдам беради. Philips LED-тизимларининг яна бир устун жиҳати шуки, у ўзини-ўзи совутади, шу боисдан совутиш учун алоҳида харажатлар қилиш ёки сувни тақсимлаш шарт бўлмайди.