АҚШнинг Нью-Жерси штатида яшовчи Исидор Хэлф Кэмпбелл ва унинг рафиқаси Жойс Лин ўз фарзандларини Адольф Гитлер ва Арий ирқи деб атаганлари учун ота-оналик ҳуқуқидан маҳрум этилди. Жуфтлик ўзи ҳақида ҳужжатли фильм олиб, унда таҳқирланганларига шикоят қилишган. Бу ҳақда News.Com.Au нашри хабар берди.

Нацистлар ғоясини қўллаб-қувватловчи жуфтлик 2008 йилда ўз ўғли учун "Туғилган кунинг билан, Гитлер!" деган ёзувли тортга буюртма бергандан кейин эътиборга тушган. Қандолатчилар бу ҳақда болаларни ҳимоя қилиш хизматига хабар беришган. Ижтимоий хизматчилар шундан кейин жуфтликнинг уйига ташриф буюриб, уларнинг фарзандлари билан муносабатларида ҳеч қандай ножўя ҳаракатларни аниқлашмаган, бироқ Гитлер ва Арий Ирқи исмли ўғил ва қизчани ота-оналаридан тортиб олишга қарор қилишган.

Кейинроқ жуфтлик ота-оналик ҳуқуқидан маҳрум этилган. Болалар отасининг айтишича, у "шунчаки ирқий сегрегацияга ишониши" ва ўз фарзандларини умуман мазаҳ қилиш нияти бўлмаганини айтган.

Жуфтлик ўзининг дунёқарашларини кенг аудиторияга тушунтириш мақсадида ўзи ҳақида "Meet The Hitlers" ("Гитлерлар билан танишинг") деб номланган ҳужжатли фильм суратга олди. Бу фильм интернетда 5 апрелда пайдо бўлди.

Сегрегация – ирқий таҳқирлашнинг бир тури бўлиб, аҳолининг бирор гуруҳини ирқий ёки этник мансублигига кўра мажбурий бўлаклаш сиёсатидир.