АҚШнинг Флорида штатидаги "Аутвест Фармс" (Outwest Farms) деган жойда ферма эгаси Ли Лайтси ва унинг ўғли Мэйсон тўнғизларга ов қилиш вақтида баҳайбат аллигаторни (тимсоҳсимон жонзот) отиб ташлашди.

"Биз тўнғизларга ов қилаётганимизда моллар ўтлайдиган ўтлоқдаги сув ҳавзаларидан бирида аллигаторга дуч келдик. Бу ерларда аллигаторлар кўп учрайди. лекин буниси жуда баҳайбат эди", деб воқеани гапириб берди фермер.

Аллигаторнинг узунлиги 4,5 метр, вазни эса 350 кг га яқин бўлган. Аллигаторнинг ёнида фермернинг 9 ёшли ўғли анча кичик кўринади. Фермернинг айтишича, у судралиб юрувчининг гўштини хайр-эҳсон қилмоқчи, терисидан эса тулум ясамоқчи.

Америка аллигаторлари АҚШнинг жануби-шарқидаги Флорида ва Луизиана штатларида яшайди. Турли маълумотларга кўра, бу штатларнинг ҳар бирида миллионга яқин аллигатор яшайди. Флорида штати аллигатор ва тимсоҳлар ёнма-ён яшайдиган дунёдаги ягона жой ҳисобланади.

Аллигаторлар тимсоҳлардан чўзилганроқ тумшуғи, кўзларининг танасининг юқорироқда жойлашгани билан фарқ қилади. Икки тури мавжуд: америка аллигатори ва хитой аллигатори.

Тарихда қайд қилинган энг катта аллигатор Луизиана штатидаги Марш оролида топилган ва унинг узунлиги 5,8 метр, вазни эса тоннага яқинни ташкил қилган. Бироқ бу маълумотлар мутахассисларда кўплаб шубҳали саволларни туғдиради. Одатда, энг йирик америка аллигаторлари 4,5 метрдан каттароқ ўса олмайди, деб ҳисобланади.