2016 йилнинг 22 март куни Бельгия пойтахтидаги халқаро аэропорти кутиш залида ўзини портлатиб юборганлардан бири 2009-2010 йилларда Европарламентда фаррош сифатида фаолият юритган. Ушбу маълумотни Европарламент матбуот хизмати ҳам тасдиқлаган.

Ахборотда унинг исмига ойдинлик киритилмаган бўлсада, ўша пайтларда талаба бўлган жиноятчи ёзги таътилида Европарламентни тозалаш ишлари билан шуғулланувчи фирмага ёлланган. Фаррошлик компанияси ўз навбатида, ходимининг жиноий ишларга алоқаси йўқлигига Европарламентни ишонтирган.

RTL телеканали эса, полициядаги манбасига таянган ҳолда, Нажим Лахравий ҳақида гап бораётганини таъкидламоқда. У Париждаги 13 ноябрь воқеалари ижрочиларига худкуш белбоғларини тайёрлаб берганликда ҳам гумон қилинмоқда.

Эслатиб ўтамиз, 22 март куни эрталаб Брюссель аэропортида иккита ва "Маэльбек" метроси яқинида битта портлаш содир этилган эди. Сўнгги маълумотларга кўра, хунрезликлар натижасида 35 киши ҳаётдан кўз юмган, 340 нафар инсон жабрланган.