Daimler автомобилсозлик концернининг бепул буфетида анъанавий немис сосискалари сабабли компаниянинг икки акциядори жанжаллашиб кетди. Ушбу воқеа акция эгаларининг ҳар йилги йиғилиши давомида юз берди.

Воқеанинг аёл иштирокчисига эркак акциядорнинг ўз ликопчасига Германияда севиб тановул қилинувчи бу сосискадан ҳаддан ташқари кўп солгани ёқмаган ва аёл эркакка танбеҳ берган. Натижада улар орасида даҳанаки жанг чиққан. Агарда маъмурият полицияни чақирмаганида бу жанжал ҳақиқий муштлашувга айланиб кетиши ҳам мумкин эди, деб маълум қилмоқда Bloomberg агентлиги.

Таъкидланишича, учрашувга компаниянинг 5,5 минг акциядори келган ва улар учун 12,5 мингта сосикка тайёрланган.

Daimler’нинг кузатув кенгаши раиси Манфред Бишоф бу ҳолатга изоҳ бериб, компания акциядорлар йиғилишига кўпроқ егулик харид қилиши кераклигини айтган.

"Ёки бизга кўпроқ сосиска керак, ёки умуман ундан воз кечишимиз лозим" деб айтган Бишоф.

Йиғилишда Daimler акциядорлари бир акцияга 3,25 евро қийматида дивиденд берилишини маъқуллашди. Агентликнинг таъкидлашича, бу пулга Германияда ушбу сосисканинг иккита пачкасини харид қилиш мумкин.