Европа Иттифоқи махсус комиссияси ярим йил ичида халқаро шаффофлик қоидасига риоя этмайдиган ва солиққа оид маълумотларни алмашмайдиган давлатлар бўйича рўйхат тузишни режалаштирмоқда. Бу ҳақда иқтисодий ва молиявий масалалар, солиққа тортиш ва божхона иттифоқи бўйича еврокомиссар Пьер Московиси маълум қилган.

У "Панама ҳужжатлари" деб номланувчи махфий маълумотларнинг ошкор қилиниши билан боғлиқ можароларни шарҳлар экан, шундай режани билдирган.

Московиси шунингдек, бундай рўйхат аввалроқ тузилгани, аммо тўлиқ бўлмаганини қайд этар экан, Панама ҳукуматини Европа Иттифоқи билан молиявий маълумотларни алмашишга чақирган.

Еврокомиссиянинг ўзи мазкур можаронинг бевосита иштирокчиси бўлиб қолгани хусусида эса, ушбу ахборотга аниқлик киритиш борасида Европа парламенти ихтиёрида барча имкониятлар борлигини таъкидлади.

Эслатиб ўтамиз, "Панама ҳужжатлари"да иқлим ўзгаришлари ва энергетика масалалари бўйича еврокомиссар Мигель Ариас Каньетенинг исми шарифи ҳам бор.

Маълумки, OCCRP, ICIJ ва дунёнинг етакчи нашриётларининг ўнлаб журналистларидан иборат гуруҳи, 3 апрель куни давлат раҳбарлари, сиёсатчилар, спортчи ва маданият арбобларининг офшор битимларига алоқасига оид маълумотларни ошкор қилган эди.