MENSA деб аталувчи жаҳондаги энг ақлли кишилар ташкилоти аслида нима билан шуғулланади? NUR.KZ сайти шу саволга жавоб топишга уриниб кўрган.

Стол маъносини берувчи лотинча "мensa" сўзи билан номланувчи клуб ақлий қобилияти (IQ) юқори бўлган кишилар учун ташкил этилган, энг йирик ва машҳур нотижорий ташкилот бўлиб, IQ тестларини ер сайёрасининг 98 фоиз аҳолисига нисбатан яхшироқ топширган кишилар унинг аъзоси бўла олишади.

Унинг 50дан ортиқ давлатда миллий шўъбалари фаолият юритади, аъзолари сони 100 давлатдаги 120 минг кишидан ортади. Клубга 1946 йили асос солинган. Менсанинг ўз "конституция"си, яъни Низоми ҳам бор.

Жамоа аъзолари, турли нарсаларга қизиқишади, шунга кўра ўз гуруҳларини ташкил этишади. Мисол учун, АҚШда мотоциклчилар ва бизнес амалиётлар билан қизиқувчилар гуруҳи бор.

Айтиш жоизки, клуб аъзолари ҳордиқ чиқариш ва кўнгил ёзиш мақсадида тўпланадилар холос. Улар, мафия ўйини ёки покер ўйнашлари мумкин. Учрашувларда сиёсий, диний мавзулар муҳокама этилмайди, аксинча фан-маданиятга оид хабарлар мунозара марказида бўлади.

Ўз даврида Айзек Азимов, Жон МакАфи ва бошқалар Mensa аъзолари бўлишган. "ВКонтакте" асосчиси Павел Дуров ҳам шу ташкилот аъзоси экани тахмин қилинади.

Менса сайтида айтилишича, клуб аъзолари орасида миллионерлар қатори ишсизлар ҳам бор. Унда, профессорлар билан бир даврада, ҳайдовчилар, олимлар ва ўт ўчирувчилар, бошқа касб эгалари тўпланиб фикр алмашишлари, ҳордиқ чиқаришлари мумкин.