«ПСЖ» бош мураббийи Лоран Блан ЕЧЛнинг чорак финалида «Манчестер Сити»га қарши кечган баҳсдан кейин фикрларини билдириб ўтди.

«Бу биз учун жуда ҳам яхши натижа эмас. Билмайман, бу асабийлик туфайлими, биз кўплаб техник хатоларга йўл қўйдик. Айниқса, «Манчестер Сити»нинг иккинчи голи қўпол хатодан кейин урилди.

Статистикага қарайдиган бўлсак, биз ўзимиз истаган ўйинни кўрсатганимиз кўринади. Лекин «Манчестер Сити» футболчилари бизни хатолар қилишга мажбур этди.

Ибраҳимович бугун ўзига ўхшамади: пенальтини уролмади, яккама-якка вазиятдан фойдалана олмади. Бу Златан учун ёмон оқшом эди, у гол урмаган ҳар оқшом унинг учун ёмон.

Биз фақат ўз уйимизда эмас, сафарда ҳам гол ура олишимизни исботлаб бўлганмиз. Агар жавоб ўйинида ҳам бугунги ўйинимизни намойиш эта олсак ва хатоларга йўл қўймасак, кейинги босқичга чиқамиз.

Кейинги ўйинда икки футболчимиз (Давид Луиз ва Блез Матюиди) дисквалификация туфайли майдонга туша олмайди. Лекин ўйлайманки, кейинги босқичда биз ўйнаймиз. Бу қийин, лекин иложсиз иш эмас», – дейди Блан.