Россия президенти Владимир Путин 14 апрель куни “Владимир Путин билан тўғридан тўғри мулоқот” телекўрсатувида россияликларнинг саволларига жавоб беради. Бу ҳақда Кремль матбуот хизматига таяниб ТАСС хабар берди.

Кўрсатув дастури анъанавий тарзда апрель ойининг ўрталарида 14 йилдан буён амалга оширилади. Трансляция Москва вақти билан куннинг қоқ ярмида бошланади, уни “Первый”, “Россия 1”, “Россия 24” каналлари, “Маяк”, “Вести FM” ва “Радио России” радиоканаллари эфирга узатади.

Президентнинг чиқишини интернет сайтларида махсус дастурлар орқали кузатиш, Россия Ижтимоий каналида кар-соқовлар учун таржима воситасида тинглаш имкони бўлади.

Дастур студиясига сиёсатчилар, жамоат арбоблари ва машҳур телесюжет қаҳрамонлари таклиф этилади. Улар Путинга тўғридан тўғри савол беришлари мумкин бўлади.

Бундан ташқари, мамлакатнинг турли ҳудудларида ташкил этилган кўчиб юрувчи студиялар орқали аҳоли давлат раҳбарига тўғридан тўғри мурожаат қила олади.

Суҳбат қанча давом этиши маълум эмас. Рекорд давомийлик 2013 йили қайд этилган, ўшанда президент аҳоли билан 4 соату 48 дақиқа давомида мулоқот қилган.