Shvetsiya o‘z shaxsiy telefon raqamiga ega bo‘lgan dunyodagi birinchi davlat bo‘ldi. Endi Shvetsiyadan tashqaridagi istalgan odam +46771793336 telefon raqamiga qo‘ng‘iroq qilib, tasodifiy ulangan shved bilan gaplashishi mumkin bo‘ladi.
Ushbu imkoniyatga maxsus dasturni yuklab olgan shvedlar ega bo‘ladilar. Qo‘ng‘iroq shvedlardan biror-biri javob bermaguncha aksiya ishtirokchilari orasida qayta yo‘naltirilaveradi.
"Meduza" nashrining bosh muharriri Aleksandr Polivanov bu raqam bo‘yicha Shvetsiyaga telefon qildi va u Shvetsiyaning markaziy qismida joylashgan Karlstad shaharchasida yashovchi Daniel ismli shaxs bilan bog‘landi. Daniel Polivanovga dasturni o‘rnatganidan beri unga 3 kishi qo‘ng‘iroq qilganini aytgan. Uning aytishicha, unga kimdir Turkiyadan telefon qilib, "Salom" deya go‘shakni qo‘yib qo‘ygan, yana bir kishi umuman hech narsa aytmagan, texaslik bilan suhbat esa ancha davom etgan.