Асламбек Забиров (исм-фамилиялар ўзгартирилган) ўз хонадонида бўш дискларга ҳар хил кинофильм ва клиплар ёзиб, уларни Тошкентнинг аҳоли гавжум жойларида сотиш билан шуғулланиб келганлиги аниқланди. Бу ҳақда “Ҳуқуқ” нашри хабар бермоқда.

СВОЖЖДЛҚК департаментининг Тошкент шаҳар бошқармаси томонидан ўтказилган тезкор тадбирда ҳуқуқбузарнинг қинғир иши фош этилди.

Забировнинг уйи кўздан кечирилганда, бу ерда 21 дона дискларга тез ёзадиган қурилмалар жойлаштирилган компьютер процессори, рангли принтерлар ва жуда кўп миқдордаги кинофильмлар ва клиплар ёзилган тайёр дисклар, бошқа зарур қўлбола мосламалар, техник воситалар борлиги аниқланди.

Қонунга хилоф равишда иш тутган ҳуқуқбузарнинг уйидан 19 млн. сўмга яқин товар-моддий бойликлар ашёвий далил сифатида олинди.

Ушбу ҳолат юзасидан жиноят иши қўзғатилиб, суд томонидан қонунбузарга нисбатан тегишли жазо тайинланди.