Полициянинг маълум қилишича, 6 апрель куни кечқурун Бангладеш ҳудудида қасддан қотиллик амалга оширилган. Жаганнат Университетижа журналистика йўналишида магистр бўлган 26 ёшли Назимуддин Самад уйига қайтаётганда уч ёки тўрт киши томонидан қуршаб олинган. Қотиллар дастлаб Самадга пичоқ билан ташланишган, сўнгра отиб кетишган.

"Жиноятчилар мотоциклларда воқеа жойидан қочиб кетгани сабабли ҳеч ким мазкур иш бўйича қўлга олинмаган", деб хабар қилган Дакка полицияси вакили.

Бангладешлик талабалар, ўз навбатида ваҳшиёна қотилликка ўз муносабатларини билдириш мақсадида намойишлар ўтказган.

Қайд этилишича, Самаднинг ўлдирилиши мамлакатда кейинги 14 ой ичида олтинчи журналистнинг ўлдирилиши бўлди.

Маълумотларга кўра, ушбу қотиллик аксар аҳолиси мусулмонлар бўлган мамлакатда эркин фикрловчи журналистларга қарши кураш, қўрқитиш ва уларга таҳдид қилиш усулларидан биридир.

Бангладеш конституциясида Ислом дини давлат дини сифатида қайд этилган бўлсада, дунёвийлик қоидалари ҳам қўллаб-қувватланади.

Самаднинг танишларидан бири Имрон Саркарнинг айтишича, Назимуддин эркин ва дунёвий фикрловчи фаол ходимлардан бири бўлган.

"У, диний фундаментализм, уруш жиноятлари, коррупция ва аёллар ҳуқуқлари поймол этилишини фош этувчи мақолалар муаллифи эди",-дейди Имрон Саркар.

АҚШ давлат департаменти матбуот котиби Марк Тонер ўз навбатида, Самаднинг ўлдирилишини "ваҳшийлик" сифатида баҳолаб, Вашингтон терроризм ва диний экстремизмга қарши курашда Бангладеш ҳукуматига ёрдам беришда давом этишини таъкидлаган.