Халқаро автомобиль федерацияси (FIA) ва "Формула-1" пойгасини бошқарувчи компания раҳбари Берни Экклстоун жамоаларнинг саралаш босқичи форматини 2015 йилда амал қилган шаклига қайтариш бўйича илтимосини маъқуллади. Бу ҳақда ташкилот матбуот хизмати хабар бермоқда.

2016 йилги мавсум олдидан "Формула-1"да янги саралаш формати киритилди. Аввал саралаш 3 босқичдан иборат бўлган. 1-босқичдан кейин 6 пойгачи, 2-босқичдан кейин яна 6 пойгачи чиқиб кетган. Янги форматга кўра, ҳар бир босқич бўйича вақтнинг маълум оралиқларида энг секин ҳаракат қилган пойгачиларнинг чиқиб кетиши усули қўлланади.

Янги формат мавсумнинг Австралия ва Баҳрайндаги биринчи босқичларида қўлланди ҳамда пойгачилар, жамоа раҳбарлари ва мухлислар томонидан кўплаб танқидларга учради. Автопойганинг барча 11 жамоаси FIA ва пойга раҳбариятига мурожаат қилиб, аввалги саралаш форматини қайтаришни сўради.

"Барча жамоалардан илтимос олингандан кейин FIA президенти Жан Тодт ва Берни Экклстоун чемпионат манфаати йўлида 2015 йилги саралаш форматини қайтариш бўйича таклифни "Формула-1" комиссияси ва FIA’нинг автоспорт бўйича бутунжаҳон кенгашига кўриб чиқишга беришга рози бўлдилар", дейилмоқда хабарда.

Агар таклиф пойганинг раҳбар идоралари томонидан маъқулланса, 2015 йилги форматга Хитой Гран-присидаёқ қайтилиши мумкин ва мавсум охиригача шу формат сақлаб қолинади. Хитой Гран-приси Шанхайда 15-17 апрель кунлари бўлиб ўтади.