Венесуэла президенти Николас Мадуро мамлакат парламенти ваколати муддатини камайтириш эҳтимоли ҳақида маълум қилди. Бу ҳақда Рейтер агентлиги хабар тарқатган.

Қайд этиш керакки, парламентнинг янги таркиби асосан мухолифлардан иборат ва улар аллақачон Мадуронинг истеъфоси бўйича референдум ўтказиш ташаббуси билан чиқишган.

Венесуэладаги маҳбусларни озодликка чиқариш ҳақидаги қонун лойиҳасига қарши ўтказилган намойиш вақтида фаоллардан бири, юрист Эрманн Эскарра президентга парламент ваколати муддатини 5 йилдан 60 кунгача қисқартиришни таклиф этган.

"Агар мен бу восита давлат тўнтарилишидан сақлаб қоладиган бўлса ва халқ мени қўллаб-қувватласа, мен ундан фойдаланаман", деган президент.

У бу вариантни жиддий ўйлаб кўраётгани ҳақида айтган.

Венесуэлада ҳукуматнинг қонун чиқарувчи ва ижро этувчи тармоқлари ўртасидаги низолар январда — парламентда сайлов якунларига кўра, кўпчилик ўрнини мухолифат кучлари эгаллаганидан сўнг юзага келган эди.

Парламент 10 март куни президент Николас Мадуронинг истеъфоси бўйича референдум ўтказиш ҳақидаги қонун лойиҳасини биринчи ўқишдаёқ маъқуллаганди.