11-15 апрель кунлари Қозоғистон президенти Нурсултон Назарбоев бир қатор хорижий мамлакатлар бўйлаб ташрифларни амалга оширади. Бу ҳақда Оқўрда матбуот хизмати хабар тарқатган.

Хусусан, 11-12 апрель кунларида Назарбоев президент Ҳасан Руҳоний таклифига кўра Эрон Ислом Республикасига боради.

Ташриф давомида 2014 йилнинг сентябрида Руҳоний томонидан Остонага уюштирилган ташриф вақтида амалга оширилган келишувларнинг амалий жиҳатлари кўриб чиқилади.

Бундан ташқари, томонлар савдо-иқтисодий, инвестициявий, қишлоқ хўжалиги, транзит-транспорт соҳаларидаги ҳамда халқаро ва ҳудудий хавфсизлик масалаларидаги ўзаро ҳамкорликни мустаҳкамлаш масаласаини муҳокама этишади.

13-14 апрель кунлари Қозоғистон раҳбари Туркия республикасига боради.

Бу ташриф вақтида у Туркия раҳбари Ражаб Тойиб Эрдўған билан учрашиб, Остона ва Анқаранинг асосий йўналишлардаги ҳамкорликларини муҳокама қилишади. Бундан ташқари, икки томон делегацияси "Адолат ва тинчлик учун бирлик ҳамда садоқат" мавзусидаги Саммитда иштирок этади. Шунингдек, томонларнинг бизнес доиралари учрашуви ўтказилиши кўзда тутилган.

15 апрель куни Нурсултон Назарбоев Ўзбекистон республикасига келади ва мамлакат президенти Ислом Каримов билан учрашади.

Давлат раҳбарлари учрашуви вақтида Ўзбекистон ва Қозоғистоннинг икки томонлама муносабатларидаги муҳим жиҳатлари муҳокама этилиши кутилмоқда.