Хитойнинг Шаньси вилоятида яшайдиган эгизаклар бўлган икки жуфт эр-хотин бир-бирларини адаштириб қўймаслик мақсадида пластик жарроҳлик амалиётидан ўтади. Бу ҳақда Daily Mail хабар қилган.

Опа-сингил эгизаклар Юнь Фэй ва Юнь Ян февраль ойида турмушга чиқишди. Қўшни қишлоқда яшовчи ака-ука эгизаклар Чжао Синь ва Чжао Сюань уларнинг умр йўлдошларига айланишди. Уларнинг тўрталаси ҳам турмуш ўртоғи аслида ким эканлигини фарқлай олмагани сабаб ўз қиёфасини ўзгартиришга қарор қилган.

Эгизак уканинг айтишича, бир куни у сайрга чиққанида, ёнидаги аёл унинг келинойиси бўлиб чиққан. Бундан ташқари, эгизаклардан иборат бу икки ёш оилани уларнинг яқин қариндошлари ва дўстлари ҳам ажрата олмай қолишди.

Шанхайдаги шифохоналарнинг биридаги шифокорлар операция ўтказишга ва мижозларнинг қиёфасини бирозгина ўзгартиришга розилик билдирган. Шифокорлар сўзларига кўра, эр-хотинларнинг пешона ва бурун қисмини ўзгартириш кўзда тутилган.