Sky News Arabia телеканали сайтидан ИШИДнинг суриялик 175 нафар ишчини қатл қилгани ҳақидаги хабари олиб ташланган.

Айни вақтда бу хабарга кирмоқчи бўлганлар 404 хатолигига дуч келишмоқда.

Бундан олдинроқ, телеканал сайтида 6 апрель куни Дамашқ яқинидаги цемент заводидан ўғирлаб кетилган 300 нафар ишчининг 175 нафари оммавий равишда қатл қилингани ҳақида хабар берилганди.

Шунингдек, бу ҳақда Рейтер агентлиги ҳам қисқача хабар берганди. Агентлик ўз хабарига суриялик ҳарбийларни манба қилган. Айни вақтда Рейтер бу маълумот ҳақиқийлигини текширмоқда.

Жангарилар Дамашқ яқинидаги Абу аш-Шамат ҳудудида жойлашган Al Badia Cement компаниясига тегишли заводга 6 апрель куни ҳужум қилишган.

ИШИД одамларни қўрқитиш учун тез-тез шундай қотилликлар уюштириб туради. Ушбу йилнинг январь ойида Дайр-аз-Зорда тинч аҳоли вакиллари бўлган 280 нафар киши қатл қилингани ҳақида хабар қилинганди. Ироқнинг Мўсул шаҳрида ИШИД қурбонлари сони 4 минг киши бўлган.