Тошкент шаҳар табиатни муҳофаза қилиш қўмитасида мамлакатимизда анъанавий ўтказилаётган «Тоза ҳаво» тадбирининг жорий йилдаги биринчи босқичини ташкил этиш билан боғлиқ масалаларга бағишланган семинар бўлиб ўтди.

Ўзбекистон Табиатни муҳофаза қилиш давлат қўмитаси томонидан ташкил этилган тадбирда Соғлиқ сақлаш, Ички ишлар вазирликлари вакиллари, Жиззах, Сирдарё, Тошкент вилоятлари табиатни муҳофаза қилиш қўмиталари мутахассислари ва журналистлар иштирок этди.

Ўзбекистон Табиатни муҳофаза қилиш давлат қўмитаси, Ички ишлар, Соғлиқни сақлаш вазирликлари ҳамкорлигида икки босқичда ўтказилаётган “Тоза ҳаво” тадбиридан кўзланган мақсад автотранспорт воситаларидан атмосферага чиқарилаётган заҳарли газларни камайтириш, аҳолининг экологик маданиятини юксалтириш ва атроф-муҳит мусаффолигини таъминлашдир.

2015 йилда ўтказилган ана шундай тадбирда олтмишдан кўпроқ автотранспорт корхоналари, автомобилларга ёқилғи қуйиш шохобчалари, техник кўрик ўтказиш станцияларида экологик назорат ўтказилган. 230 мингга яқин автотранспорт воситаларининг техник ҳолати кўздан кечирилган.

Ушбу тадбир натижасида ҳар йили ҳавога чиқарилаётган зарарли моддаларни қарийб юз тонна камайтиришга эришилмоқда. Тадбирнинг 2016 йилдаги илк босқичи 10 апрелдан 10 майга қадар ўтказилади. Иккинчи босқичини 10 августдан 10 сентябргача (Тошкент шаҳрида 10 сентябрдан 10 октябргача) ўтказиш режалаштирилган.