Туркиядаги Бурса вилояти ҳарбий-ҳаво лицейи ўқувчилари денгизни нефть доғларидан тозалашнинг янги усулини яратишди. Anadolu ахборот агентлигининг маълум қилишича, ўқувчилар бақлажон уни бу вазифани бозорда мавжуд воситалардан кўра самаралироқ бажаришини аниқлашди.

Ўқувчилар бу тадқиқотларини учта университет билан ҳамкорликда олиб боришди. Идиш-товоқларни ювиш учун мўлжалланган губкани эслатувчи, махсус ўрамдаги қуритилган ва майдаланган бақлажонлар нефть доғлари бор сувга ташланади. Синовлар натижаларига кўра, бундай восита ўз вазнидан 18 марта кўпроқ нефть ва нефть маҳсулотларини сўриб олиши аниқланди.

Ноу-хау муаллифларидан бири Аҳмет Демирдашнинг айтишича, "бозорда мавжуд воситаларнинг ютиш даражаси макмимум 16 мартагачани ташкил қилади".

"Бундан ташқари, улар бизнинг ихтиродан 5 баробар қиммат. Ҳозирда ишлатилувчи воситалар ёки махсус абсорбцион тўсиқлар, ёки гранулалардаги кимёвий реагентлардир. Уларнинг камчилиги шундаки, уларни қайта ишлатиб бўлмайди. Яна сорбентли махсус губкалар ҳам бор", деб айтди Демирдаш.

Демирдаш бақлажон уни эвазига бозордан рақобатчиларни сиқиб чиқаришга муваффақ бўлинишига умид билдирди.

"Ҳозирча бизнинг асосий рақобатчимиз сорбентли губкалар ҳисобланади. Уларни сувни юзасига ташлаб, кейин йиғилган нефть сиқиб олинади. Бироқ бизнинг ихтиромиз бир неча марта арзон, кўпроқ ифлосланишларни ютади ва қайта ишлатилиши мумкин", деб айтди Демирдаш.

Мавжуд маълумотларга кўра, анъанавий сорбентнинг бир тоннаси нархи деярли 11 минг долларни, "бақлажон губкалари"нинг бир тоннаси нархи эса 2,5 минг долларни ташкил қилади. Лаборатория тажрибалари бақлажон унининг сувдаги турли ифлосланишларни бартараф этишда истиқболи юқорилигини кўрсатди. Ихтиро муаллифлари ўз ихтиролари учун миллий патент олишнинг биринчи босқичидан ўтишди.