Вьетнам социалистик республикаси Миллий мажлиси мамлакат президенти Чан Дай Куанг томонидан тасдиқлаш учун киритилган номзодларни Олий суд раислиги ва бош халқ прокурори лавозимларига тасдиқлади.

Суд раислигига номзод 58 ёшли Нгуен Хоа Биньни парламентнинг 95 фоизи қўллаб-қувватлаган бўлса, 64 фоиз депутатлар янги бош прокурорни ёқлаб овоз беришган. Бу лавозимга 56 ёшли Ле Минь Чи тайинланган.

Вьетнам парламенти бугунги мажлисида шунингдек, мамлакатнинг 2011-2016 йиллардаги бош вазирнинг икки ўринбосари, 18 нафар вазирлик ва турли идоралар раҳбарларини вазифасидан озод этиши масаласини ҳам кўриб чиқади.

Вьетнамнинг 2016-2020 йиллар учун вазирлар маҳкамаси янги таркибини бош вазир Нгуен Суан Фук эртага парламент ихтиёрига ҳавола этади.

Умуман, мамлакат раҳбариятнинг янги таркиби шу йил январь ойида Вьетнам коммунистик партиясининг XII съездида тасдиқлаб олинган эди.