6 апрель куни Япониянинг йириклиги бўйича 3-рақамли ороли Кюсюдаги Кагосима префектурасида йўқолиб қолган Hawker Beechcraft U-125 патруль самолёти бўлаклари 7 апрель куни мамлакат жанубидаги тоғлар ҳудудида топилгани тасдиқланди. Бу ҳақда Киодо хабар берган.

Самолёт Япония ҳаво мудофааси кучларига тегишли бўлган.

Қайд этилишича, самолёт бортида бўлганларнинг 4 нафари жасади қолдиқлари 7 апрель куни, яна иккисиники 8 апрель куни тонгида аниқланган.

Икки моторли Hawker Beechcraft U-125 6 апрель куни эрталаб Сайтама префектурасидаги Ирума базасидан парвоз қилган ва тушки пайт Каноя базасига (Кагосима префектураси) қўнган. Шундан сўнг самолёт Такакума тоғли ҳудудини қисқа муддатли патруль назоратидан ўтказиш учун базани тарк этган, кечки пайт эса Сайтамага қайтиши лозим бўлганди. У Япония ҳаво мудофааси кучларининг базасидан шимолга томон 10 км узоқликда радарлардан йўқолиб қолган. Самолётни қидиришга 600 нафарга яқин одам жалб қилинган. Улар қидирув ишлари давомида Кагосима префектурасидаги Такакума тоғли ҳудудини кўздан кечириб чиқишган.