Бельгия полицияси Брюсселдаги терактларга алоқаси бўлиши мумкин бўлган террорчиларни қўлга олди

Жаҳон 09 Апрель 2016 386

Бельгия полицияси Париж ва Брюсселдаги терактлар иштирокчилари бўлиши мумкин бўлган Муҳаммад Абриний ва Усама Крайамни қўлга олди. Гумонланувчилар Брюсселнинг Андерлехт коммунасида ҳибсга олинган. Бу ҳақда Брюсселдаги матбуот-анжуманида Бельгия федерал прокурори Фредерик Ван Лев маълум қилди.

Терговчилар тахминига кўра, Бельгияда яшаган, келиб чиқиши марокашлик бўлган 31 ёшли Муҳаммад Абриний 2015 йил ноябрдаги Париждаги ва яқинда Брюсселда амалга оширилган терактларни ташкил қилишга алоқадор.

"Прокуратура Муҳаммад Абринийнинг ҳибсга олинганини тасдиқлаши мумкин. Айни вақтда биз у 22 мартда Брюссель аэропортида кузатув камералари томонидан икки террорчининг ёнида муҳрланган одам (шляпали одам) эканлиги ҳақидаги маълумотни текширмоқдамиз", деб айтди Ван Лев.

Бундан ташқари, ҳуқуқ-тартибот муассасалари ҳужумларга алоқаси бўлиши мумкин бўлган 3 кишини ҳибсга олди. Терговчиларнинг фикрича, айнан Абриний аэропортда террорчиларга ҳамроҳлик қилган учинчи – "шляпали одам" бўлиши мумкин.

Эҳтимол, у ҳам бомбани портлатиши керак бўлган, бироқ охирги лаҳзада қочиб қолган. Усама Крайам эса Мальбек метро станциясидаги терактга алоқадорликда гумонланмоқда.

Бельгия ҳуқуқ-тартибот муассасалари ҳибсга олинганлар ҳақида жуда кам маълумот беришига қарамасдан, маҳаллий ОАВ Абринийнинг Париждаги терактларга алоқаси борлигини аниқлашга муваффақ бўлишди. Айнан Абриний Франция шимолида терактлардан икки кун аввал кузатув камералари томонидан Париждаги терактларнинг ижрочиси ва эҳтимол ташкилотчиларидан бири бўлган Салоҳ Абдисалом билан бирга қора автомобиль рулида ўтирганда қайд қилинган.

Кўпроқ янгиликлар