Эрон ҳукумати тарқатган маълумотларга кўра, Boeing Co. авиасозлик корпорацияси вакиллари яқин орада Теҳронга келади. Улар, катта эҳтимол билан ҳамкорлик масалаларини муҳокама этишлари мумкин, деб хабар қилмоқда Associated Press.

Қайд этилишича, учрашувда энг йирик маҳаллий авиаташувчи Iran Air ва бошқа авиакомпаниялар қатнашади.

Бундан аввал, Эрон фуқаро авиацияси раҳбари Али Обидзода, унинг мамлакати Boeing самолётларини харид қилишини билдирган эди. Аммо, америкаликларнинг ушбу ташрифи чоғида биронта шартнома имзоланиши рад этилмоқда.

Бунгача, Iran Air Airbus компанияси билан 25 млрд долларга 118 дона самолётни сотиб олиш бўйича битимга эришган эди.

Ғарб давлатларининг ушбу мамлакатга нисбатан санкцияларини бекор қилиши натижасида, Эронда хорижий ҳаво кемаларини харид қилиш имконияти пайдо бўлди.