1989 йилда Денов туманида туғилган Шерали Қосимовга нисбатан суднинг қарорига асосан маъмурий назорат ўрнатилган бўлиб, мазкур қарорга унга бир неча чекловлар, шу жумладан, кечқурун соат 22:00 дан эрталаб 6:00 га қадар яшаш жойидан чиқиб кетиш тақиқланган эди. Аммо у чекловларни менсимади. Бу ҳақда “Ҳуқуқ” нашри ёзмоқда.

Тумандаги Янгиариқ маҳалласидаги хонадонлардан бирининг ёнида пайдо бўлиб, атрофга олазарак боққан кимса сездирмай ҳовлига кирди. Ҳовлида турган 115 минг сўмлик газ баллони ўғирлади. Кўп ўтмай уни нотаниш одамга 80 минг сўмга сотиб юборди.

Орадан бир ҳафта ўтиб, маҳалласидаги бир хонадонга ўғирликка тушди. У ердан 420 минг сўмлик 300 кг. ли макка донини ўғирлаб кетди.

Икки кундан сўнг ҳамма ухлаган маҳалда яна бир маҳалладошининг ҳовлисига кирган Шерали бу ердан ҳам қуруқ қайтмади. Уч қопдаги 210 минг сўмлик 150 кг. макка дони кўп ўтмай Шерали томонидан ўғирланиб олиб кетилди.

Жиноят ишлари бўйича Денов туман суди бир марта “оғзи куйса-да”, бунга парво қилмай, яна ўғирликка қўл урган Ш.Қосимовга 6 йил озодликдан маҳрум қилиш жазосини тайинлади.