"Форсаж" фильми юлдузи, 2013 йилда автофалокатда ҳалок бўлган марҳум актёр Пол Уокернинг қизи автофалокатда отаси билан бирга Porsche автомобилида бўлган Рожер Родас оиласидан 10 млн доллар ундирди.

Актёрнинг 17 ёшли қизи Мэдоу Уокер автофалокат пайтида машина рулида бўлган Родаснинг фалокатда айби борлигини қисман исботлашга муваффақ бўлди. 2013 йил ноябрида автомобиль эгаси бўлган Родас машинаси тезлигини 130-150 км/соатгача оширгач, унинг бошқарувини қўлдан чиқарган. Оқибатда машина чироқ устунига бориб урилган ва ёниб кетган.

Мэдоу Уокер у ундирган пул "отаси тирик бўлганда ишлаб топиши мумкин бўлган пулнинг арзимас қисми" эканлигини айтган, деб ёзмоқда Los Angeles Times нашри.

Кейинроқ маълум бўлишича, актёр "ўзининг машъум тақдирини" олдиндан билгандай 40 ёшидаёқ васиятнома туздириб қўйган. У 25 млн долларга баҳоланаётган барча бойлигини ўзининг ягона фарзанди Мэдоуга васият қилган.