Буюк Британиянинг бир неча минг аҳолиси мамлакат бош вазири Дэвид Кэмероннинг истеъфога кетишини талаб қилиб намойишга чиқди. Намойишчилар қўлларида Кэмеронга қарши плакатлар билан Даунинг-стрит кўчаси бўйлаб ўтдилар. Бунга Кэмероннинг “Панама ҳужжатлари” деб ном олган офшор можаросига алоқаси борлиги сабаб бўлган.

Норозилардан баъзиларининг бошларида панама бош кийими бўлган. Улар шу тариқа Кэмероннинг “Панама ҳужжатлари”га алоқаси борлигига киноя қилишган.

Намойишчилар Кэмероннинг ўзи улар билан суҳбатлашмагунча тарқалмасликларини айтишган. Уларнинг фикрича, можарога аралашиб қолган сиёсатчи истеъфога кетиши лозим.

“Панама ҳужжатлари” чоп этилгандан кейин Кэмерон офшор компаниясининг эгаларидан бири бўлгани маълум бўлди. Кэмерон дастлаб буни инкор қилган. Кейинроқ эса у офшор компанияси акциялари унга отасидан мерос бўлиб қолганини тан олган. Бироқ унинг айтишича, у бу акцияларни бош вазир бўлгунгача сотиб юборган.