АҚШ мудофаа вазири ўринбосари Роберт Уоркнинг берган баёнотига кўра, Пентагон Россиядан Америка ҳарбий сунъий йўлдошларига ўрнатиладиган РД-180 русумли ракета моторларини харид қилиши лозим. Бу савдо яқин олти йил ичида амалга оширилиши керак, деб хабар қилмоқда Reuters.

АҚШ Конгресси эса, Қримнинг Россияга қўшилгани сабабли, РД-180 двигателларидан 2019 йилдан кейин фойдаланишни таъқиқлаган.

Сенатнинг қуролли кучлар масалалари бўйича қўмитаси раиси сенатор Жон Маккейн ўз навбатида, гарчи РД-180 Atlas V ракеталарини учиришда муҳимлигига қарамай, ундан фойдаланишни тўхтатиш лозимлигини таъкидламоқда.

Унинг айтишича, Украинадаги воқеалар сабабли АҚШ санкциялар рўйхатига киритилган икки нафар россиялик "Роскосмос" раҳбарларидан бўлган. Маълумки, ушбу ташкилот ҳам РД-180ни ишлаб чиқарилишига бевосита алоқаси бор.

Бундан аввал, Америка мудофаа вазирлиги Aerojet Rocketdyne ва United Launch Services компаниялари билан РД-180 ўрнини боса оладиган ракета двигателлари ишлаб чиқариш бўйича шартнома имзолаган эди.