2014 йил октябридан бошлаб Чукотканинг собиқ губернатори, россиялик миллиардер Манхэттенда кўчмас мулк объектларини сотиб ола бошлаганди. New York Post газетасининг маълумотларига кўра, Абрамович Нью-Йоркнинг 75-кўчасидаги учта қўшни уйни сотиб олиш учун 78 млн долларга яқин пул сарфлаган.

Абрамович ушбу учта уйни 1,5 минг квадрат метрдан каттароқ майдон, ертўлада бассейн ва 10 метрлик ички ҳовлига эга битта уйга бирлаштирмоқчи эди. Бу реконструкция ишлари учун сарф-харажатлар 6 млн долларни ташкил қилиши белгиланганди.

Бироқ Абрамовичнинг архитектуравий орзулари шаҳарнинг Диққатга сазовор жойларни муҳофаза қилиш комссияси сабабли пучга чиқди. Комиссия миллиардернинг бу ғоясини "чидаб бўлмас истеъмолнинг янги даражаси" деб атади. Абрамовичнинг уйлари жойлашган Юқори Ист-Сайд тумани Манхэттеннинг тарихий қисми ҳисобланади ва бу ерда қурилиш ишларини эҳтиёткорлик билан олиб бориш лозим.

Натижада Нью-Йоркнинг қурилиш департаменти Абрамовичнинг режасини ман қилди. Бироқ миллиардернинг ғоясини амалга оширишга бел боғлаган архитектура бюроси бу лойиҳани ҳали ҳам амалга ошириш мумкинлигига умид боғламоқда ва бу ғояни аввалгидек "улкан" бўлмасада, сал "камтарроқ" ҳолда амалга ошириш учун рухсат олишга яна ҳужжатлар топширмоқчи.

Абрамович Буюк Британия ва АҚШдаги ҳашаматли уйларидан ташқари, Лондоннинг "Челси" футбол клуби, шахсий "Боинг-767" самолёти, учта люкс синфидаги яхта (улардан бирининг узунлиги 162,5 метр бўлиб, у бу кўрсаткич бўйича фақатгина Абу-Даби амирининг яхтасидан ортда қолади) ва бошқа кўплаб қимматбаҳо кўчар ва кўчмас мулк объектларига эга.