Ҳиндистоннинг жануби-ғарбида жойлашган Керала штатида жойлашган ибодатхонада чиққан ёнғин туфайли ҳалок бўлганлар сони 83 нафарга етган. Шунингдек, NDTV телеканалида хабар қилинишича, 350 киши турли даражадаги жароҳатлар билан шифохонага келтирилган.

Бундан олдинроқ, ёнғин туфайли қурбон бўлганлар сони 77 киши экани айтилганди.

Мамлакат бош вазири Нарендра Моди шахсан воқеа жойига йўл олган. Ёнғин ҳудудига мамлакат соғлиқни сақлаш ишлари вазири ҳам ташриф буюрган.

"Колламдаги ибодатхонада рўй берган фожиа қалбимизга келтирган жароҳатларни ва қайғуни сўз билан ифодалаш имконсиз. Мен қурбонларнинг яқинлари билан ҳамдардман, қурбонлар руҳи учун ибодат қиламан", дея ёзади бош вазир ўз твиттерида.

10 апрелга ўтар кечаси Коллам шаҳридаги ибодатхонада чиққан ёнғинга диний тантаналар вақтида ишлатилган мушакларнинг портлаши сабаб бўлган. Айни вақтда Ҳиндистонда 14 апрелда бошланувчи қуёш Янги йилига бағишланган тантаналар ўтмоқда.