10 апрелда Перуда президент ва парламент депутатлари сайловлари бошланди.

Перу президенти лавозимига 10 номзод даъвогарлик қилмоқда. Улардан асосий номзод 3 киши бўлиб, улар: коррупция ва жиноятлар учун турмада жазо ўтаётган собиқ президент Альберто Фухиморининг қизи Кейко Фухимори (ўнг позиция), собиқ бош вазир Педро Кучински ("Перуликлар ўзгаришлар учун" коалицияси) ва "Кенг фронт" сўл коалицияси вакили Вероника Мендос.

Шунингдек, номзодлар орасида мамлакатнинг икки собиқ президенти – Алан Гарсия ва Алехандро Толедо ҳам бор. Эътиборлиси, сайловларда давлат маблағларини харжлагани учун дастлабки ҳибсда бўлган Грегорио Сантос ҳам иштирок этмоқда. Ҳозирча у бўйича якуний қарор қабул қилинмаган.

Мамлакатнинг сайлов қонунчилигига кўра, сайловларнинг 1-босқичида 50 фоиз ва яна бир овоз тўплаган номзод ғалаба қозонади. Бироқ экспертларнинг фикрича, бу сайловларда 2-босқич ўтказилиши эҳтимоли катта. 2-босқичга 1-босқичда энг кўп овоз тўплаган 2 номзод чиқади. Бу ҳолда 2-босқич 5 июнда ўтказилади.

Жамоатчилик фикри сўровномасининг кўрсатишича, 2-босқичда кураш Кейко Фухимори ва Педро Кучински орасида бўлишининг эҳтимоли катта.

Перуликлар президентдан ташқари, яна икки вице-президентни, конгресснинг 130 аъзосини ва Анд парламентининг 5 депутатини сайлайдилар. Перуда сайловларда 18 ёшдан 70 ёшгача барча фуқаролар иштирок этиши шарт, сайловчиларнинг умумий сони 22,9 млн кишини ташкил қилади.