Россиялик 100 ёшли жисмоний тарбия ўқитувчиси Виталий Федеров спортнинг енгил атлетика, милтиқдан ўқ узиш, баскетбол, волейбол, сузиш турлари билан мукаммал шуғулланган. Фронтдан сўнг Азов давлат техник университетида жисмоний тарбиядан сабоқ берган.

"Кўпчилик талабалар жисмоний тарбияни айнан Федеров дарс бергани учунгина яхши кўришарди", - деди АДТУ металлургия факультети декани Леонид Тарасюк.

Виталий Федеровнинг оиласи хорижда яшайди, шунинг учун унинг 100 ёшли юбилейига қизи ва эварасигина келишди.

"Бир жойда ўтириши жуда қийин. Ҳаттоки биз ёшларнинг унга етиб олишимиз қийин, чунки биз эринчоқмиз. Бобомизда эса эринчоқлик тушунчасининг ўзи йўқ", - деди Федеровнинг эвараси Элеонора Даль.

Виталий Федеров узоқ умр кўриш - бу энг аввало ўз устида ишлаш, деб ҳисоблайди.

"Чекишни ва спиртли ичимликларни ичишни ташланг. Уйда камроқ ухланг, кўпроқ очиқ ҳавода юринг", - дейди 100 ёшли бобо.

Федеров 1 май куни талабалар билан Азов денгизи сузиш мавсумини очиб беришга ваъда берди.