Брюсселда 22 март куни терактлар амалга оширган террорчилар 2016 йилнинг ёзида Франция майдонларида ўтказиладиган Европа чемпионати вақтида терактлар уюштиришни режалаштиришгани ҳақида маълум қилинди. Бу ҳақда Liberation нашри бироз олдинроқ Париж ва Брюссель терактларига алоқадор сифатида қўлга олинган Муҳаммад Абринийнинг тергов вақтидаги кўрсатмаларига асосланиб хабар берган.

Абринийнинг маълум қилишича, Бельгиядаги гуруҳ аввалига Европа чемпионати вақтида хунрезликлар амалга оширишга тайёрланган, лекин Бельгияда тинимсиз олиб борилган текширувлар туфайли улар қўлга тушишдан олдинроқ теракт содир этишга қарор қилишган.

Эслатиб ўтамиз, 22 март куни Брюсселдаги халқаро аэропортда 2та портлаш содир этилди, бу портлашлар 2 жангарининг, ака-ука Бакравийларнинг ўзини портлатиши воситасида амалга оширилди. Кейинроқ, детонатор орқали шаҳар метросининг "Маальбек" бекатида портлаш содир этилди. Натижада, жами 35 киши ҳалок бўлиб, 340 киши жароҳатланди.

Евро-2016 турнири Франция майдонларида 10 июндан 10 июлгача бўлиб ўтади. Март ойида Франция бош вазири Мануэль Вальс Европа чемпионати бекор қилинмаслиги, унинг ўтиши учун етарли даражада хавфсизлик шароитлари муҳайё қилиниши ҳақида айтганди.

Франция махсус хизматлари ноябрдаги терактлар ҳақида 141 кун олдин хабардор бўлган