Шаҳзода Уильям ва малика Кейтнинг Ҳиндистонга бир ҳафталик сафари нохуш ҳолат билан бошланди. Жуфтлик Ҳиндистоннинг энг машҳур диққатга сазовор жойи Тож-Маҳал эҳромида суратга тушмоқчи бўлди. Ҳозирда эҳромда реконструкция ишлари бормоқда ва шунинг учун у қурилиш ҳавозалари билан ўралган. Кембриж герцог ва герцогиняси сурат мукаммал чиқиши учун ҳавозаларни олиб туришни илтимос қилишди.

Бироқ жуфтликнинг бу илтимоси ҳинд ҳукумати томонидан бетакаллуфликдек қабул қилиниб, уларнинг ғазабини келтирди, Ҳиндистон жамоатчилиги ва ОАВ эса британ шаҳзодаси номига ғазабини сочди, деб ёзмоқда Мirror.

Ҳиндистонда ҳали ҳам Буюк Британия томонидан ҳинд ҳудудлари мустамлака қилинган замонлар эсдан чиқмаган ва мамлакатда британияликларнинг ўз хоҳишини ўтказишга уриниши оғриқли қабул қилинади.

Бу орада матбуотга жуфтликнинг Ҳиндистонга сафарини Tata Steel ҳинд компанияси молиялаштиргани ҳақидаги маълумот чиқиб кетди. Компания бундан аввалроқ минглаб ходимларини қисқартиришини маълум қилганди. Уильям бу ҳолат билан боғлиқ можаро юзага келмаслиги учун ўзининг сафари дастурини ундан компания билан боғлиқ барча тадбирларни олиб ташлашни талаб қилган ҳолда ўзгартирди.