«Зенит» жамоаси ҳужумчиси, Россия терма жамоасига номзод бўлган футболчи Артем Дзюба келгусида ўзининг Европадаги жамоалардан бирига йўл олиши эҳтимоли ҳақидаги хабарларга муносабат билдириб ўтди.

«Аниқ таклиф билдирганлар йўқ. Шу ҳақда гаплар бўлди, «Милан» ва «Фиорентина», яна бир инглиз жамоаси қизиқаётгани ҳақида айтишди.

Умуман, менинг орзуим – инглиз жамоаларидан бирига ўтиш. Ёки энг камида «Реал»га (кулади). Мен шунчаки, болалигимдан «Реал»га мухлисман, лекин Испания чемпионати менга тўғри келмайди.

У ерда жуда секин ва зерикарли ўйнашади. Ҳатто ётиб, уёқ-буёққа қараб, бурун қоқиб, кейин тўпни кимга узатишга қарор қилса ҳам бўлади. Англияда эса барчаси тез, у ерда ҳақиқий кураш ва эҳтирос бор.

Лекин мен «Зенит»далигимдан хурсандман. Олдинда менда бу жамоа билан чемпионатни ва мамлакат Кубогини ютиш учун вақт бор. Биз ҳали жанг қиламиз», – дейди Дзюба.