Бразилия парламент комиссияси президент Дилма Руссеффнинг импичменти учун овоз берди. Мамлакат раҳбарининг ўз лавозимидан четлатилишини комиссиянинг 65 аъзосидан 38 нафари қўллаб-қувватлади. Бу ҳақда ТАСС ахборот агентлиги хабар бермоқда.

Қонун бўйича, комиссия қарори парламентнинг қуйи палатаси йиғилишига киритилади. Бу масала бўйича овоз бериш 17 апрелда ўтказилиши режалаштирилмоқда. Президентни ўз лавозимидан четлатиш учун депутатларнинг учдан икки қисми, яъни 342 депутат овоз бериши керак. Агар қуйи палатада импичмент тарафдорлари камчиликни ташкил қилса, унда жараён тўхтатилади, акс ҳолда импичмент бўйича якуний қарорни парламентнинг юқори палатаси – сенат қабул қилади.

Агар Руссефф ўз лавозимидан четлатилса, унинг ўрнини 2018 йилдаги сайловларгача вице-президент Мишел Темер эгаллаши керак эди. Бироқ Темер ҳам четлатилиш хавфи остида турибди. Бразилия Федерал олий суди вакили Марку Аурелиу Меллу 5 апрелда Темерга нисбатан импичмент жараёнини бошлаш қарорини чиқарган.

Агар импичмент мамлакатнинг иккала биринчи шахсига нисбатан эълон қилинса, унда ҳокимият қуйи палата раиси Эдуард Куньяга ўтади. Айнан Кунья Руссеффнинг лавозимидан четлатилишининг энг фаол тарафдорларидан бири ҳисобланади.