Бразилия вице-президенти Мишел Темернинг мамлакат президенти Дилма Руссеффнинг импичменти ҳолати учун олдиндан ёзилган нутқи хатолик туфайли ОАВга чиқиб кетди, деб хабар бермоқда Reuters ахборот агентлиги.

Темер журналистларга миллий бирдамлик ҳукуматини ташкил қилишга чорланган овозли хабар унга яқин бўлган сиёсатчиларга йўлланганини айтди. Сиёсатчилар Темердан агар Руссефф импичмент оқибатида лавозимидан кетса, у мамлакатни бошқара олиши-йўқлиги ҳақида сўрашган. Темер бу хабар WhatsApp мессенжерида бошқа нотўғри гуруҳга юборилганини айтди.

Аввалроқ Дилма Руссеф ўз рақибларининг коррупцион можаро сабабли истеъфога кетиши кераклиги ҳақидаги талабини рад этганди.