Немис телевидениеси эфирида Туркия президенти Ражаб Тойиб Эрдўған номига ҳақоратомуз шеър ўқиган телебошловчи Ян Бемерман полиция томонидан қўриқланмоқда. Бу ҳақда Кёльн шаҳри ҳуқуқ-тартибот муассасалари вакили маълум қилди.

"Унинг уйи эшиклари олдида патруль машинаси турибди", деб айтди полиция вакили ҳамда бу чоралар ҳуқуқ-тартибот муассасалари вазият ва Бемерман учун хатарларни таҳлил қилганидан кейин қабул қилинганини таъкидлаб ўтди. "Агар ҳеч нарсани истисно қилиб бўлмаса, унда қандайдир чора кўриш керак", деб айтди полиция вакили.

Бемерман 31 мартда ZDF телеканалида чиқадиган Neo Magazin Royalе ҳажвий кўрсатуви эфирида Эрдўған номига ҳақоратомуз шеър ўқиган. 11 апрелда Германия ҳукумати Штеффен Зайберт Германия ташқи ишлар вазирлиги Туркия томонидан ушбу ҳолат бўйича оғзаки норозилик нотаси олганини маълум қилди. Бу нотада Бемерманга нисбатан чоралар кўриш сўралган.

Майнц прокуратураси телебошловчига нисбатан тергов бошлади. Прокуратура маълумотларига кўра, Эрдўғаннинг ўзи ҳам даъво аризаси берган. Бу ариза кўрсатув чиққандан кейин билдирилган бошқа даъво аризаларига бириктирилади.