Ford компанияси автопилот тизимига эга автомобилларни тўлиқ қоронғуликда муваффақиятли синовдан ўтказганини маълум қилди. Бу эса бундай транспорт воситаларининг тижорат бозорига чиқишини яна бир қадамга яқинлаштиради.

Автопилот мажмуасининг асосий ташкил этувчиларидан бири борт камералари ҳисобланади. Бироқ уларнинг самарадорлиги ёруғланганликка боғлиқ.

Ford синовларининг кўрсатишича, ўзи бошқарилувчи автомобиллар моҳиятан умуман камераларсиз ишлаши мумкин. Уларга тўлиқ қоронғуликда бошқа датчиклар – лидарлар (масофани ёруғлик ёрдамида аниқловчи қурилмалар) ёрдамга келади.

Ford автопилоти Fusion Hybrid автомобилларида синалмоқда. Бундай машиналар фазонинг уч ўлчамли харитасини қуриш учун 4 та инфрақизил лидар, видеокамера ва турли датчиклардан фойдаланади.

Ford мутахассислари робомобилларни яратиш жараёнида Мичиган университети ва Массачусетс технологик институти тадқиқотчилари билан ҳамкорлик қилмоқда. Ҳозирда компания мутахассислари зарур сенсорлар ва компьютер технологияларини оммавий тарзда ишлаб чиқаришга мослаштирмоқдалар ҳамда уларнинг ишлаш алогиртмларини текшириш ва такомиллаштиришни давом эттирмоқдалар.

Тўлиқ автоматлаштирилган автомобиллар бозорга 2025 йилда чиқиши кутилмоқда. Яқин йилларда эса бундай транспорт воситаларининг синалиши Ford компаниясига харидорларга ҳаракатланишда ҳайдовчига кўмак кўрсатишнинг инновацион мажмуалари билан жиҳозланган автомобилни таклиф қилишга имкон беради.