Google X лабораторияси учун роботларни ишлаб берувчи Япониянинг Schaft стартапи Токиода бўлиб ўтган New Economic Summit конференциясида юк билан тепаликка чиқа оладиган икки оёқли роботни тақдим этди. Бу ҳақида Rakuten Today нашри хабар берди.

NEST 2016 тақдимотини Schaft вакили Юто Наканиши, Android асосчиси ва Google X’нинг роботларни яратиш бўлими собиқ раҳбари Энди Рубин олиб борди.

Наканишининг сўзларига кўра, бу роботлар 60 килограммгача бўлган юкни таший олади, зиналардан кўтарилади ва туша олади. Шунингдек, робот тошли йўллардан ва қорнинг устидан ҳам юради.

Schaft вакилининг сўзларига кўра, бундай роботлар арзон ва кам энергия истеъмол қилувчи ёрдамчиларга айланади, аммо ҳозирча улардан қайси соҳаларда фойдаланилиши маълум эмас.

NEST 2016 тақдимотида кўрсатилган видеода робот зиналарда, тоғ ёнбағрида ва қирғоқ бўйларида бемалол юра олган ва унинг оёқлари остига қувурлар ташланганда ҳам мувозанатни ушлаб турган. Роботларга ҳозирча ном берилмаган ва Google X вакиллари бу тақдимотни янги маҳсулотнинг намойиши деб ўйламасликларини айтишган.

Ҳозирги кунда Рубин Playground Global технологик инкубаторининг бош директори лавозимини эгаллаган. Унинг сўзларига кўра, компьютер платформаларининг авлоди ҳар 10-12 йилда алмашади. Рубиннинг фикрига кўра, мобиль қурилмалар эрасидан сўнг сунъий интеллект даври келади ва роботлар кейинги саноат революциясини амалга оширади.