Бугун, 13 апрель куни Ўзбекистон ўсмирлар терма жамоаси Польша ўсмирлар терма жамоасига қарши Тошкентда ўртоқлик учрашуви ўтказади. Бу учрашув 2016 йилнинг сентябрь ойида Ҳиндистонда бўлиб ўтадиган Осиё чемпионатига тайёргарлик доирасида ўтказилади.

8 апрель куни йиғинга киришган Темур Олимхўжаев бошчилигидаги жамоа польшалик тенгдошларига қарши “Жар” стадионида баҳс олиб боради. Учрашув соат 16:00да бошлади.

Польша ўсмирлар терма жамоаси 10 апрель куни Тошкентга етиб келди ва бир неча машғулотлар ўтказган.

Ўзбекистон U-16 терма жамоаси 15 апрель куни Польшага қарши яна бир учрашув ўтказади.

16 ёшгача бўлган футболчилар ўртасидаги Осиё чемпионати 2016 йилнинг 15 сентябрь – 2 октябрь саналари давомида, Ҳиндистонда бўлиб ўтади. Унда Осиёнинг 16 мамлакати ўсмирлари иштирок этади.

Ушбу турнир саралаш баҳслари давомида Темур Олимхўжаев бошчилигидаги терма жамоа Мальдив (8:0), Фаластин (6:0) ҳамда Яман (5:2) жамоалари устидан ғалаба қозониб, “А” гуруҳи ғолиби сифатида қитъа биринчилигига йўл олганди.